Guth Gafa Documentary Festival 2008

Déantús Scannán Gníomhaí – cruthú agus dáileadh scannán gan buiséad

Tugann an seimineár fóram do déantóirí-gníomhaithe scannán plé a dhéanamh ar na modhanna a mbaineann siad úsáid astu chun scannáin atá cruthaithe gan buiséad a léiriú is a scaipeadh. Déanfar plé ar scannáin bainteach le dhá fheachtas polaitiúil leanúnach: ‘Those Who Dance’, cuntas ar an aighneas leanúnach i Ros Dumhach, Co. Mhaigh Eo, le Camilla Cancantata i láthair, agus ‘Tara Saga’, togra leanúnach faisnéise ag déileáil leis an fheachtas reatha chun suíomh ársa na Teamhrach a chaomhnú in aghaidh tógáil an M3 i gContae na Mí. Thionscnaigh Mark Cantwell an togra seo, agus beidh sé i láthair ag an seimineár. Is iad Amanda Slevin, ionadaí MAOR; brúghrúpa ar son acmhainní nádúrtha agus ceisteanna timpeallacht bunaithe i nDún na nGall, agus Sharon O Farrell, baill d’fheachtas Save Tara, na haíonna eile a bheas i láthair don seimineár.

Insíonn ‘Those Who Dance’ scéal pobail bhig in iarthar na hÉireann agus a seasamh i gcoinne beartaíocht Shell le píblíne ard-bhrú agus teirmineál próiseála a thógáil ar a gcuid talún. Cuireann sé an staid seo acu i gcomparáid le cás mhuintir Ogoni ar Delta na Nígire, áit ar éag Ken Saro-Wiwa agus na mílte eile mar gheall ar a seasamh neamhfhoréigneach in aghaidh gníomhaíochtaí Shell. Tugann an clár dúshlán don lucht féachána machnamh a dhéanamh ar impleachtaí domhanda an tionscail peitriléim agus fírinne dhosheachanta athraithe aeráide. Agus ár spleáchas ar bhreoslaí á cheistiú aige, is dúshlán paiseanta é teacht i dtír ar an fhuinneamh inchothaithe.

Cumadóir agus seiftitheoir le cúlra san amharclann is san cheol is ea Camilla Cancantata. Mar chomhbhunaitheoir Footloose Community Arts, réitíonn sí ceardlanna i bpobail logánta, ar théamaí timpeallachta go minic. I measc a cuid cumadóireachtaí tá ceoldráma ‘garbh’: ‘Soya Susie and the Gene Dictators’, agus ‘Trident, a British War Crime’ oratorio fá choinne glóracha gan tionlacan. Chum Camilla an ceol le haghaidh ‘Those Who Dance’. Tá an scannán stiúrtha ag Mayyasa Al-Malazi atá i mbun dhéantús chláracha faisnéise le 13 bliana anuas. Tá dúthracht láidir aici le ceisteanna feimineacha, coir shóisialta, an timpeallacht agus ceisteanna pobail. Tá a cuid saothar taispeánaithe ar Independent Television sa Bhreatain, Channel 4 News agus teilifís seirbhíse poiblí sna Stáit Aontaithe.

www.shelltosea.com (lean na nascanna chuig Those Who Dance)
www.corribsos.com

Mobilise Act Overcome Reclaim Is grúpa daoine bunaithe san iar-thuaisceart é MAOR (an focal Gaeilge fá choinne ‘cosantóir’ nó ‘stíobhard’) a tháinig le chéile sa bhliain 2006 i gcomhghuaillíocht leis an fheachtas Shell to Sea agus mar gheall ar cheisteanna ag baint le taiscéalaíocht gáis agus ola amuigh ó chósta Dhún na nGall a thosaigh i mí Márta 2008. Is í atá mar aidhm ag MAOR ná feasacht a ardú agus díospóireacht a ghineadh i leith úinéireacht is baintistíocht acmhainní nádúrtha na hÉireann. Is gníomhachaí pobail ó oirthear Dhún na nGall agus chomhbhunaitheoir MAOR í Amanda Slevin.

www.maorderry.blogspot.com

Is é Tara Saga teideal oibre thogra faisnéise fá dtaobh de shuíomh ársa na Teamhrach i gContae na Mí, Éire. Gineadh an tionscnamh mar gheall ar fhorbairt chunspóideach mótarbhealaí fríd an tírdhreach stairiúil seo agus is é rún chruthaitheoir/comhordaitheoir Tara Saga, Mark Cantwell, go bhfeidhmeoidh an suíomh idirlín mar thaiscumar do bhailiú agus do chruinniú bhunphíosaí scannán a bheas mar bhonn do shraith faisnéise ar deireadh thiar. Eisítear formhór na bhfíseán le ceadúnas Comhchearta Cruthaitheacha a chuireann ar chumas éinne iad a roinnt agus saothar úr a chumadh astu. Cuirtear fáilte roimh fhocail tráchta fosta, agus tá sé an-soiléir go mbíonn fáilte roimh inchur uathu siúd atá ar son agus in aghaidh forbairt an mhótarbhealaí.

www.itison.tv
www.itison.net

Bhí Sharon O Farrell mar rúnaí ag an fheachtas chun Gleann na Teamhrach agus an Skryne a shábháil go dtí cúpla bliain ó shin, agus tá sí fós páirteach san fheachtas. Ó aois óg di, bhí spéise ar leith aici i ndúchas agus cultúr, agus sa dóigh a mhúnlaigh luath-stair na hÉireann cruth na tíre sa lá atá inniu ann. Mar dhúchasach na hUaimhe, bhí Teamhair ina tírdhreach aithnidiúil thar na blianta ba fríd an nasc seo a tháinig an bhaint seo aici leis an fheachtas chun an chuid den mhótarbhealach atá le dul fríd Ghleann na Teamhrach a chur ar shlí eile. Fá láthair tá Sharon ina sícipteiripeoir agus ealaíontóir mórthimpeall na hUaimhe.